1Եւ այլազգիք պատերազմեցա՛ն ընդ Իսրայէլի, եւ փախեան յերեսաց այլազգեացն. եւ անկան վիրաւորք ՚ի լերինս Գեղբուայ։ 2Եւ պնդեցան այլազգիքն զհետ Սաւուղայ, եւ զհետ որդւոցն նորա, եւ հարին այլազգիքն զՅովնաթան, եւ զԱմինադաբ, եւ զՄեղ՚քիսաւէ զորդիսն Սաւուղայ։ 3Եւ ծանրացաւ պատերազմն ՚ի վերայ Սաւուղայ, եւ գտին զնա աղեղնաւորք աղեղամբք եւ ցաւովք, եւ վտանգեցաւ յաղեղանցն։ 4Եւ ասէ Սաւուղ ցկապարճակիրն իւր. Ձգեա՛ զսուր քո եւ խոցեա՛ զիս դովաւ, մի՛ գուցէ եկեսցեն անթլփատքն այնոքիկ, եւ խաղասցեն ինեւ։ Եւ ո՛չ կամեցաւ կապարճակիրն նորա՝ վասն զի երկեաւ յոյժ. եւ ա՛ռ Սաւուղ զսուրն, եւ անկաւ ՚ի վերայ նորա։ 5Եւ ետես կապարճակիրն նորա թէ մեռաւ Սաւուղ, անկաւ եւ նա ՚ի վերայ սրոյն իւրոյ՝ եւ մեռաւ։ 6Եւ մեռան Սաւուղ, եւ երկոքին որդիքն իւր յաւուր յայնմիկ. եւ ամենայն տուն նորա միանգամայն մեռան։ 7Եւ ետես ամենայն այր Իսրայէլի որք ՚ի հանգրուանսն էին, եթէ փախեաւ Իսրայէլ, եւ եթէ մեռան Սաւուղ եւ որդիք նորա, թողին զքաղաքս իւրեանց եւ փախեան. եւ եկին այլազգիքն եւ բանակեցան ՚ի նոսա։ 8Եւ եղեւ ՚ի վաղիւն՝ եկին այլազգիքն կողոպտե՛լ զվիրաւորսն, եւ գտին զՍաւուղ եւ զորդիս նորա անկեալս ՚ի լերինն Գեղբուայ, 9մերկացուցին զնա. եւ առին զգլուխ նորա, եւ զզէն նորա, եւ առաքեցին յերկիր այլազգեաց, շուրջանակի աւետարանե՛լ կռոցն իւրեանց՝ եւ ժողովրդեանն. 10եւ եդին զզէն նորա ՚ի տան աստուածոյն իւրեանց. եւ զգլուխ նորա եդին ՚ի տան Դագոնայ։ 11Եւ լուան ամենեքեան որ բնակեալ էին ՚ի Գաղաադ, զոր ինչ արարին այլազգիքն ընդ Սաւուղ եւ ընդ Իսրայէլ. 12եւ յարեան ՚ի Գաղաադէ ամենայն արք զօրաւորք, եւ առին զմարմինն Սաւուղայ եւ զմարմինս որդւոց նորա, եւ բերին Յաբիս՝ եւ թաղեցին զոսկերս նոցա ընդ կաղնեաւն Յաբիս. եւ պահեցին աւուրս եւթն։ 13Եւ մեռաւ Սաւուղ յանօրէնութիւնսն իւր, զորս անօրինեցաւ ՚ի Տէր. ըստ բանին Տեառն զի ո՛չ պահեաց. վասն զի եհարց Սաւուղ վհկաւն խնդրել. եւ պատասխանի արար նմա Սամուէլ մարգարէ. 14եւ ո՛չ խնդրեաց զՏէր. եւ սպան զնա. եւ դարձոյց զթագաւորութիւնն Դաւթի որդւոյ Յեսսեայ։